აბსტრაქტი. „ინფორმაციული აფეთქება“ ასე უწოდეს თავის დროს ინფორმაციული ტექნოლოგიების გლობალური განვითარებისა და მომხმარებლის სწრაფი ტემპებით ზრდის პროცესს. მოცემული პროცესი კიდევ უფრო დააჩქარა პანდემიის არსებობამ, რომლის დროსაც ინტერნეტისა და ინტერნეტ ტექნოლოგიების გამოყენებამ როგორც საყოფაცხოვრებო, ისე პროფესიულ დონეზე არნახულ ზღავრს მიაღწია. სამწუხაროდ, ინტერნეტისა და ინტერნეტ ტექნოლოგიების სწრაფი მიმართულებით განვითარების პოზიტიურ პროცესს თან ახლავს გარკვეული რისკები, რაც საფრთხეს უქმნის გლობალური ინტერნეტ ქსელის ერთიანობასა და უსაფრთხოებას, მის მდგრადობასა და სტაბილურ განვითარებას. როცა ვსაუბრობთ გლობალური ინტერნეტ ქსელის ერთიანობაზე, უსაფრთხოებასა და სტაბილურობაზე, აუცილებლად უნდა ავღნიშნოთ გაერთიანებული ერების ორგანიზაციის გენერალური მდივნის მიერ მოწვეული ინტერნეტ მმართველობის ფორუმი , რომლის მუშაობაში ჩართული არის ყველა დაინტერესებული მხარე - საჯარო და კერძო სექტორები, სამოქალაქო საზოგადოება და აკადემიური წრეების წარმომადგენლები. ეს არის საუკეთესო პლატფორმა, სადაც ხდება ინტერნეტ სივრცეში მიმდინარე პროცესების შესახებ აზრთა გაცვლა, დისკუსია და გამოცდილებების გაზიარება დაინტერესებულ მხარეთა შორის როგორც გლობალურ, ისე ეროვნულ და რეგიონალურ დონეზე.